Маълумки, Ўзбекистон Республикаси Президентининг 2017 йил 23 майдаги “Ички ишлар органларининг ёнғин хавфсизлиги бўлинмалари фаолиятини тубдан такомиллаштириш тўғрисида”ги қарорига мувофиқ, юртимизда ҳафтанинг ҳар чоршанба куни “Ёнғинлар профилактикаси куни” деб эълон қилинган. Шу муносабат билан Тўрткўл тумани ёнғин хавфсизлиги ходимлари ҳам бир қатор ташкилотлар билан биргаликда ҳафтанинг чоршанба кунлари тумандаги корхона ташкилотлар ва таълим муассасаларида бўлиб, ёнғинларнинг олдини олишга қаратилган тарғибот тадбирлари ва турли хил мусобақалар ташкил қилиб келмоқда.
Яқинда тумандаги Болалар ва ўсмирлар спорт мактабида ўтказилган «Ёш ёнғин ўчирувчи» мусобақасининг туман босқичи ҳам юқори даражада ташкил қилиниб, унда жамоалар ўзаро муросасиз беллашдилар.
Мусобақа Ёнғин хавфсизлиги бўлими, Ёшлар иттифоқи туман кенгаши, Жисмоний тарбия ва спорт мактаби ҳамда Тўрткўл телевидениеси ҳамкорлигида тумандаги коллеж ва мактаб ўқувчи ёшлари ўртасида ўтказилди.
Ушбу мусобақа ёшларни ёнғин ўчирувчи касбига қизиқтириш, бу борадаги ишларни кенг тарғиб қилиш, шунингдек, ўқувчи ёшларнинг ёнғин хавфсизлиги бўйича амалий кўникмалари ва жисмоний тайёргарлигини ошириш мақсадида ташкил қилинган. Мусобақада тумандаги таълим муассасаларининг ўқувчи ёшларидан ташкил топган жамоалар уч шарт бўйича ўзаро беллашдилар.
Мусобақа якунида Тўрткўл банк коллежи фахрли биринчи ўринни, 1-сонли умумтаълим мактаби жамоаси эса иккинчи ўринни эгаллашди. Академик лицей жамоаси учинчи ўринга муносиб топилди.
Ғолиб жамоалар туман Ёнғин хавфсизлиги бўлими, Ёшлар иттифоқининг туман кенгаши ҳамда ҳамкор ташкилотлар томонидан “Фахрий ёрлиқ” ва эсдалик совғалар билан тақдирланди. Биринчи ўринни эгаллаган Банк коллежи жамоаси мусобақанинг Қорақалпоғистон Республикаси босқичига йўлланмани қўлга киритди.
Туманда ўтказилаётган бу каби тадбирларда юзлаб ўқувчи ёшлар иштирок қилмоқда. Ўйлаймизки бундай тадбирлар уларда ёнғинларнинг олдини олиш борасидаги тушунчаларини янада оширишга, асосийси, ёнғинлар инсон саломатлиги ва моддий бойликлари учун ҳақиқий офат эканлигини тўла англашига хизмат қилаётир. Бу тадбирлардан кўзланган мақсадимиз ҳам ёшлар ва барча фуқароларни доимо огоҳликка чорлашдир. Негаки, кейинги вақтларда юзага келган ёнғинларнинг таҳлили шуни кўрсатмоқдаки, 35-40 фоизгача ёнғинлар фуқароларнинг лоқайдлиги, эътиборсизлиги, ёнғин хавфсизлиги қоидаларига амал қилмасликлари натижасида, 20-25 фоизи электр тармоқлари ёки электр асбоблари носозлигидан, 6-12 фоизи газ печкаларининг носозлилигидан, 6-10 фоизи болаларнинг олов билан ўйнаши оқибатида юзага келмоқда.
Жаҳон соғлиқни сақлаш ташкилотининг маълумотларига кўра, ҳар йили дунёда содир бўлаётган ёнғинлар оқибатида 200 мингдан ортиқ киши ҳалок бўлмоқда, моддий зарар ҳақида гапирмаса ҳам бўлади. Мамлакатимизда олиб борилаётган ёнғинга қарши чора-тадбирлар бундай бахтсиз ҳодисаларга қарши ишончли қалқон бўлади.
Доно халқимизда олов — тилсиз ёв, деган ибора бор. Лекин, маиший ҳаётимизда оловдан жуда кўп фойдаланамиз ва унинг аҳамияти, фойдаси ҳақида ортиқча гапиришнинг ҳожати йўқ. Шундай экан, оловни ёвга айлантирмасдан, ундан белгиланган қоидалар асосида фойдаланиш ҳар биримизнинг вазифамиздир.
Анвар Жумашов,
Тўрткўл тумани ЁХБ бошлиғи ўринбосари, подполковник.
