Ўзбекистон Республикаси Олий Мажлиси Қонунчилик палатаси ва маҳаллий Кенгашларга бўлиб ўтган сайловлар шаффофлик ва юқори ташкилотчилик билан ўтказилди.

Сайловлар натижаси бўйича ЎзЛиДеПдан Олий Мажлис Қонунчилик палатасига 3 нафар, Қорақалпоғистон Республикаси Жўқорғи Кенгесига 19 нафар, туман (шаҳар) Кенгашларига 140 нафар депутатлар сайланди.

Бахытбай Алламуратов, 6-сонли «Чимбой» сайлов округидан, Олий Мажлис Қонунчилик палатаси депутатлигига сайланган депутат.

— Ҳақиқатан ҳам бу йилги сайловлар ўтган сайловлардан бутунлай бошқача бўлди. Кескин сиёсий кураш майдонидан ўтдик. Бироқ, бу осон бўлмади.

Ушбу сайловда номзодлар сиёсий ва ҳуқуқий билим даражасига қараб, танлаб олинганлиги, уларнинг ҳар бир соҳада фаол эканлиги кўзга ташланди.

Сайловчилар билан чекка овулларда учрашувлар ўтказганимда одамларнинг сиёсий дунёқараши ниҳоятда юксак эканлиги кўринди.

Менинг биринчи марта депутат бўлиб сайланишим. Бироқ бизнинг олдимизда кейинги беш йилда катта масъулият ва халққа берган ваъдаларимизни бажариш вазифа турибди. Уларнинг ишончини оқлаш учун амалий ишларимизни кўрсата олишимиз керак деб ўйлайман.

Депутатлик бу мартаба эмас балки, у халққа ёрдамчи бўлиб аҳолини ўйлантираётган муаммоларни чуқур ўрганиб, ечимини топишда фаоллик кўрсатадиган халқ вакилидир. Бизнинг вазифамиз халқчил, адолатли бўлиб ишончни оқлаш ва сайловчиларга чин дилдан хизмат этишдир.

Сағындық Турманов, 49- сонли «Қўнғирот» сайлов округидан Қорақалпоғистон Республикаси Жўқорғи Кенгеси депутатлигига сайланган депутат.

— Очиғини айтганда бу йилги сайловлар ошкора ўтди. Эътиборли томони ҳозирги сайловчилар кечаги сайловчи эмас. Уларнинг сиёсий онгги, дунёқараши ўзгарди. Ўзлари муносиб деб билган, ишонган номзодларга овоз берди. Сайловчилар кўпроқ қоғоздаги қуруқ ваъдаларга эмас балки, амалий натижаларга ишонади. Бугунгидай жамоатчилик назорати кучайиб, ОАВ, халқ томонидан жамиятимизнинг барча соҳалари танқидий тахлил қилиниб, назорат қилинаётган бир даврда биз депутатлар масъулиятни чуқур англаб халқ ишончини оқлашимиз лозим. Сабаби, ишонч бу жуда катта масъулиятдир.

Сайловчилар менга иккинчи марта ишонч билдирар экан, бу ишончни оқлашим керак албатта.

Тамара Юсупова 14-сонли «Пахтакор» сайлов окуригидан халқ депутатлари Амударё туман Кенгаши депутатлигига сайланган депутат.

— Ўзим яшайдиган Амударё туман Кенгаши депутатлигига сайландим. Халқ менга ишонган экан, мен ушбу ишончни оқлашим лозим. Партия сайловолди дастурида аҳолини айниқса, ёшларни иш билан таъминлаш масаласига алоҳида эътибор қаратилган.

Биз “Тадбиркорлик –аҳоли бандлигининг гарови” деб биламиз ва янги иш ўринларини ташкил этиш тарафдоримиз. Бунинг учун ўзим хусусий тадбиркор сифатида халқни айниқса, уйда ишсиз ўтирган хотин-қизларни тадбиркорликка кенг жалб қилиш, шу орқали уларнинг бандлигини таъминлаш ишларига ўзимнинг куч-ғайратимни сафарбар этаман.

Қ.Х.А.