Қорақлпоғистон Республкаси Божхона бошқармаси ва унинг бўлимлари томонидан чегара божхона постларида чет давлатлардан юртимизга коронавирус инфекцияси кириб келишининг олдини олиш мақсадида бир қатор тегишли чора-тадбирлар амалга оширилмоқда.
Бошқарма томонидан берилган маълумотларга қараганда, вирус тарқалган дастлабки кунларданоқ барча чегара божхона постларида бошқа мутасадди ташкилотлар билан биргаликда ўқув-тактик машғулотлар ўтказилган. Ушбу машғулотларда барча ходимларга коронавирус инфекцияси кириб келишининг олдини олиш бўйича зарур билим ва кўникмалар берилган.
Қорақалпоғистон Республикаси Фавқулодда ҳолатлар бошқармасида ташкил этилган коронавирус инфекцясининг четдан кириб келиши ва тарқалишининг олдини олиш бўйича Республика мувофиқлаштирувчи штабида Божхона бошқармасида навбатчилик қилиб борувчи ходимларнинг рўйхати тасдиқланган бўлиб, бошқа назорат қилувчи идоралар билан ахборот алмашиш йўлга қўйилган.
Барча чегара ўтказиш пунктларидаги ва халқаро аэропортлардаги одамлар ҳаракатланадиган залларда кунлик санитария карантин, ветеринария, фитосанитария назорат идоралари билан биргаликда дизенфекция ишлари амалга оширилмоқда. Шунингдек, транспорт ва йўлакларда дезбарьер ва дезтўшамалар мунтазам равишда ишлаши таъминланган.
Республикамиз ҳудудига кириб келаётган тирик ҳайвонлар, гўшт-сут маҳсулотлари ва бошқа ветеринария назорати остидаги юклар, шунингдек, озиқ-овқат маҳсулотларининг тегишли назорат тартибларидан ўтиши бўйича назорат ўрнатилган.
Чегара назорат постларида Санитария-эпидемиологик осойишталик агентлиги, Ветеринария ва Ўсимликлар карантини муасасалари ходимларининг ўз ишларини тўлиқ амага оширишлари учун барча шароитлар яратилган. Изолятор хоналари ташкил этилган ва чегара божхона постлари орқали чет давлатлардан кириб келаётган фуқаролар дастлабки тиббий кўрикдан божхона постларининг ўзида ўтказилмоқда.
Шунингдек, чегара божхона постлари орқали ҳаракатланаётган фуқаролар Санитария назорат пункти ходимлари билан биргаликда ҳарорати кўтарилган йўловчиларни аниқлаш, кириш ва чиқиш йўлларида фаолият олиб бораётган ходимларнинг доимо ниқобларда бўлишини таъминлаш чоралари кўрилган. Божхона омборхоналарида турган почта жўнатмаларини ўз эгаларига тарқатишни санитария қоидалари ва гигиена талабларига мувофиқ олиб бориш назорат қилинмоқда.
Шу йилнинг 16 мартидан бошлаб коронавирус инфекциясининг олдини олиш мақсадида профилактик чоралар сифатида чет давлатлардан фуқароларнинг юртимизга кириб келиши бўйича вақтинча чеклов ўрнатилди. Хорижий давлатлардан юртимизга қайтган фуқароларимиз 14 кун давомида карантин ҳолатида бўлиши белгиланди.
Профилактик тадбирлар сифатида жорий этилаётган мана шундай чекловлар ташқи савдо операциялари, яъни экспорт-импортга жорий этилмайди. Аҳолининг истеъмол товарларига, хусусан, чет давлатлардан олиб келинган озиқ-овқат маҳсулотларининг олдинги миқдоридаги импорти давом этади.
Бу ички бозоримизда истеъмол товарлари ва озиқ овқат маҳсулотлари танқислиги юз бермайди, деганидир.
А.Жиемуратов,
Қорақалпоғистон хабар агентлиги.
