Ўзбекистон Республикаси Президенти ва ҳукумати томонидан тадбиркорлик ҳаракатини жадал ривожлантиришни қўллаб-қувватлашга, хусусий мулкни ҳар томонлама ҳимоя қилиш ҳамда мамлакатда ишбилармонлик муҳити сифатини оширишга қаратилган янги қонун ва фармонлар қабул қилинмоқда.
Қабул қилинаётган норматив ҳужжатларда кичик бизнес ва хусусий тадбиркорликка кенг эркинлик бериш, уларнинг фаолиятига давлат органларининг аралашувини тубдан қисқартириш, ҳуқуқбузарликларнинг барвақт олди олинишини таъминлаш, уларнинг профилактикаси самарадорлигини ошириш ва ҳуқуқбузарликларга йўл қўйилмаслик, ортиқча қоғозбозлик ва коррупцияни йўқ қилиш тадбиркорлик фаолиятини янада ривожлантириш соҳасида давлат сиёсатининг муҳим устувор йўналиши ва давлат органларининг биринчи даражали вазифаси этиб белгиланган.
Ўзбекистон Республикасининг 2019 йил 11 декабрдаги “Тадбиркорлик субъектларини тугатиш тартиби такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисидаги” қонуни билан қонун ҳужжатларида белгиланган муддатларда фаолиятини амалга оширмаган тадбиркорлик субъектларини тугатиш жараёни соддалаштирилди. Қонун 2020 йил биринчи январдан кучга кирди.
Молия хўжалик фаолиятини амалга оширмаганлиги сабабли белгиланган тартибда ҳаракатсиз режимига ўтказилган ҳамда ўтказилган санадан бошлаб уч йил мобайнида ўз фаолиятини қайта тикламаган субъектлар рўйхатдан ўтказувчи орган қарори билан тугатилади. Тугатувчи оммавий ахборот воситаларида юридик шахснинг тугатилиши ҳақида эълон жойлаштиради. Эълонда юридик шахс кредиторларининг талабларини бериш муддатлари ва тартиблари кўрсатилади. Ушбу муддат эълон жойлаштирилган кундан бошлаб икки ой муддатдан кам бўлмаслиги керак.
Кичик бизнес субъектлари ва хусусий тадбиркорларимиз Президентимиз ҳамда ҳукуматимиз қўллаб-қувватлашидан фойдаланган ҳолда республикамизда ислоҳотларни чуқурлаштириш, иқтисодиётни либераллаштириш, экспорт салоҳиятини ошириш, ҳалқимиз бандлиги ва бозорларимиз тўкинлигини таъминлаш йўлида олиб борилаётган ишларда ўзларининг муносиб ҳиссаларини қўшадилар, деб ишонамиз.
Азат Ибрагимов,
Нукус шаҳар статистика бўлими бошлиғи.
