Қорақалпоғистон Республикаси Жўқорғи Кенгеси Раиси М.Камалов Қораўзак туманидаги «Қорабуға» овул фуқаролар йиғинида истиқомат қилувчи Иккинчи жаҳон уруши қатнашчиси Генжемурат Алланиязовнинг хонадонида бўлиб, байрам совғаларини топширди.

Ўзбекистон Республикаси Президентининг жорий йил 20 апрелдаги “Хотира ва қадрлаш кунига тайёргарлик кўриш ва уни ўтказиш чора-тадбирлари тўғрисида”ги қарори ижроси доирасида “Хотира бор экан – миллат барҳаёт”, “Эътибор ва ғамхўрлик – инсоний бурч” шиорлари остида тадбирлар ўтказилмоқда. Иккинчи жаҳон уруши қатнашчиларига, фронт орти меҳнат фахрийларига, мустақиллик йилларида хизмат бурчини бажариш чоғида ҳалок бўлган ҳарбий хизматчилар ва ҳуқуқни муҳофаза қилиш органлари ходимларининг оила аъзоларига моддий ва маънавий ёрдамлар кўрсатилмоқда.

Қорақалпоғистон Республикаси Жўқорғи Кенгеси Раиси М.Камалов уруш фахрийсини 9 май — Хотира ва қадрлаш куни ва Иккинчи жаҳон урушида қозонилган Ғалабанинг 76 йиллиги билан қизғин қутлади.

Фахрий отахонга давлатимиз раҳбарининг байрам табригини ўқиб эшиттириб, Ўзбекистон Республикаси Президенти номидан 12 000 000 (ўн икки миллион) сўм миқдорида бир марталик пул мукофотини тантанали равишда топширди. Қорақалпоғистон Республикаси Жўқорғи Кенгеси номидан қимматбаҳо совғалар тақдим этилди.

– Мамлакатимизда биз уруш қатнашчиларига ҳамиша эҳтиром кўрсатиб келинмоқда, бунинг учун давлатимиз раҳбарига миннатдорлик билдирамиз, – дейди уруш қатнашчиси Генжемурат Алланиязов. – Саломатлигимиздан хабар олиб туришибди. Илоҳим, энди уруш бўлмасин, бугунги фаровон ҳаётимизга кўз тегмасин.

Қорақалпоғистон Республикаси санъат усталари, Шимоли-ғарбий ҳарбий округи оркестри аъзолари ижросидаги куй-қўшиқлар фахрий отахонимизнинг уруш йилларида кўрсатган жасоратини ёдга солди.

* * *

Шу куни Қорақалпоғистон Республикаси Жўқорғи Кенгеси Раиси ўринбосари А.Давлетов Нукус шаҳридаги “Амударё” маҳалласида яшовчи Иккинчи жаҳон уруши қатнашчиси Қадирбой Нармановнинг хонадонида бўлди. Унга давлатимиз раҳбарининг байрам табригини ўқиб эшиттирди ва Ўзбекистон Республикаси Президенти номидан 12 000 000 (ўн икки миллион) сўм миқдорида бир марталик пул мукофоти ва Қорақалпоғис­тон Республикаси Жўқорғи Кенгеси номидан қимматбаҳо совғалар топширди.

Д.Абибуллаев.

М.Ҳабибуллаев олган сурат.