Нукуслик тадбиркор “Зияда Нур” ўқув маркази раҳбари Зияда Утеназарова  хайрли ишга қўл урди. У маҳалладаги “Темир дафтар” ва “Аёллар дафтари” га киритилган  юз нафарга яқин ишсиз хотин-қизларни тикувчилик, сартарошлик ва қандолатчилик курсларида бепул ўқитди. Уларнинг ҳар бири ўзлари танлаган йўналишлар бўйича мутахассислардан касб сирларини ўрганди.

2018 йилда тикувчилик, сартарошлик, ошпазлик бўйича иш бошлаган ўқув курси бугунги кунда 18 та йўналишда фаолият олиб бормоқда. Марказнинг янги бинога эга бўлиши фаолият турларининг кенгайиши ва таълим сифатининг янада ошишига имкон бермоқда.

– Ҳунарим бўлмаганлиги боис иш топишда анча қийналдим, – дейди “Бойтерак” маҳалла фуқаролар йиғинида яшовчи Дина Ганиева. – Бу ерда мутахассислардан қисқа вақтда тикиш-бичиш сирларини ўргандик. Келажакда ўзим ҳам тикувчилик билан шуғулланишни мақсад қилганман.