Нукус шаҳрида регби-7 бўйича аёллар ва эркаклар жамоалари ўртасида ўтказилган Ўзбекистон кубоги ва чемпионати баҳслари якунланди.

Беллашувлар натижасига кўра, кубок мусобақасида 1-ўринни аёллар жамоалари ўртасида мезбонлар, эркаклар жамоалари орасида эса Тошкент шаҳри эгаллади.

Ўзбекистон чемпионатида қорақалпоғистонлик қизлар 1-ўринга мушарраф бўлди. 2- ва 3- ўринларни Навоий ва Тошкентнинг “Университет” жамоалари қўлга киритди.

Эркаклар жамоалари ўртасидаги баҳсларда эса ­Тошкент шаҳри ғолибликни қўлга киритган бўлса, Қорақалпоғистон ва Хоразм вакиллари кейинги ўринларни эгаллашди.

Чемпионат якунларига кўра, мусобақаларда муносиб қатнашган жамоаларнинг иқтидорли спортчилари орасидан аёллар ва эркаклар терма жамоаси шакллантирилади.