Гулистон МАТЁҚУБОВА,

Қорақалпоғистон халқ шоири.

Ватан тарихида шонли сана бор,

Мангу истиқлолга метин пойдевор,

Ҳаётбахш қудрати, салоҳияти,

Озод кўнгилларга фахр-ифтихор,

Саодат Қомуси — Конституциям!

Ҳаёт ҳар инсонга улуғ неъматдир,

Ҳимоя қилинар қайда бўлса ҳам,

Туғилган Ватани ҳур мамлакатдир,

Ҳуқуқ, эркинлиги мудом мустаҳкам,

Шон-шавкат Қомуси Конституциям!

Дўстлик, биродарлик олий қадрият,

Юртда бағрикенглик дахлсиз қудрат.

Фаровон ҳаётдан ўсар овул-эл,

Бирдан-бир манбаи халқ бўлган давлат,

Садоқат Қомуси — Конституциям!

Ҳар ким ўз имони, эътиқодига,

Фикр, Сўз, Эркига эгалиги бор,

Ҳар ким Ватанининг ҳур равнақига,

Виждон, ор-номуси билан дахлдор,

Кафолат Қомуси — Конституциям!

Озод меҳнатдан ризқ-насиба бутун,

Топар ҳар ким ўзин касбидан камол,

Азиздир оналар, азиз оталар,

Мустақиллик билан ёшлар баркамол,

Ҳимоят Қомуси — Конституциям!

Қадриятлар улуғланар, сақланар,

Тарих, маънавият энг бой меросдир.

Табиат, Ер ва сув жондай асралар,

Ҳаммаси фидоий халқимга хосдир.

Ақл-ҳикмат Қомуси — Конституциям!

Қорақалпоқ юртим, ота маконим,

Устюртим, Қоратоғ маъданларга кон,

Асосий Қомуси Ўзбекистоннинг,

Келажагинг учун мустаҳкам девон.

Ҳур давлат Қомуси — Конституциям!

Юртбоши халқимнинг тинчлигин сақлаб,

Жаҳонда ёқлар юрт манфаатларини,

Ватаннинг энг улуғ ишончин оқлаб,

Оширар шон-билан шавкатларини.

Адолат Қомуси — Конституциям!