Сен кўкларга кўтарилсанг, кўкдаман мен,

Шондаман мен, шарафдаман, кўркдаман мен,

Тарихлардан ошиб келган Темур туғи,

Юлдузлари йўлимга нур юрт байроғи.

Ҳар рангу, ҳар чизиғингда минг  бир ҳикмат,

Ҳилолингда — эзгу амал, эзгу мақсад,

Мовий осмон, тинч замин, мустаҳкам сарҳад,

Суврати-сийратинг сурур юрт байроғи.

Томиримда оққан қоннинг ирмоқлари,

Навқиронлик, умид, поклик сенда бари,

Элтадирсан иқбол, тараққиёт сари,

Ой ёнида ўрнинг турур юрт байроғи.

Муаззаму-азиздирсан дил қушимда,

Кўзимда ёш қалқийди ҳар боқишимда,

Сени юксак кўтарганлар олқишимда,

Довруғинг оламга борур юрт байроғи.

Туркийлар ҳар ҳалқасида ўз ўрнинг бор,

Дунёнинг ҳар нуқтасида ўз ўрнинг бор,

Борлиқнинг ҳар жабҳасида ўз ўрнинг бор,

Халқ иқболин сенда кўрур юрт байроғи.

Сен кўкларга кўтарилсанг ёғилгай шон,

Шу эл учун юксакларда туғилгай шон,

Сен улуғсан, улуғ Янги Ўзбекистон,

Ўзинг фахр, ўзинг ғурур юрт байроғи!

Назира МАТЯҚУБОВА.