Ўтаётган йил менинг ҳаётимда ҳам, юртдошларимиз ҳаётида ҳам мазмунли ва самарали йил бўлди, десам адашмайман. Зеро, мамлакатимизда узоқни кўзлаб амалга оширилаётган ислоҳотлар, хориж инвестицияларини ўзлаштириш, маҳаллийлаштириш борасидаги хайрли чора-тадбирлар нафақат шаҳарларда, балки энг чекка қишлоқларда ҳам янги иш ўринлари яратиш, бозорбоп ва рақобатбардош маҳсулотлар ишлаб чиқаришга пухта замин яратмоқда.
Фикримни ана шундай саъй-ҳаракатлар натижаси бўлган замонавий корхона, Қонликўл туманида бунёд этилган “КАНТЕКС ИНВЕСТ” масъулияти чекланган жамияти мисолида давом эттираман.
Президентимиз 2017 йил январь ойида Қорақалпоғистон Республикасига қилган ташрифи чоғида Қонликўл туманида қисқа фурсатда юқори сифатли калава ип ишлаб чиқаришга ихтисослаштирилган замонавий корхона бунёд этиш бўйича топшириқ берган эди. Шундан сўнг корхона қурилиш ишларига киришилди.
Туман ҳудудидан ажратилган 10 гектар ерда 650 иш ўрнига эга бўлган, қиймати 38,52 миллион АҚШ долларилик лойиҳа асосидаги муҳташам корхона барпо этилди. Шу кунларда корхонада дастгоҳларни ўрнатиш, монтажлаш ишлари олиб борилмоқда.
Корхонада асосан маҳаллий ёшларни иш билан таъминлашга алоҳида эътибор қаратилган. Йилига 10-11 минг тонна энг сифатли калава ип ишлаб чиқарилиб, тўлиқ экспортга жўнатилади. Натижада ҳудудга йилига тахминан 27-30 миллион АҚШ долларилик тушум жалб этилиши кўзда тутилган.
Германиянинг “Стручлер” компанияси дастгоҳлар ўрнатиш бўйича мутахассиси Субрата Деб, “Маҳаллий ёшлар тиришқоқ, меҳнаткашлигидан хурсандман”, дея тез-тез такрорлайди. Чунки, биз кўрган нарсамизни тез ўзлаштириб олаяпмиз. Хорижлик ҳамкасбларимиз эса бу ерда шартнома асосида дастгоҳларни ўрнатиш бўйича иш олиб боришяпти. Улар шу юртга нафи тегаётганидан, корхона қурилишида иштирок этаётганидан мамнун.
Тўғриси, туманимизда илгари ҳеч бир замонавий корхона йўқ эди. Мана бугун “КАНТЕКС ИНВЕСТ”дек замонавий муҳташам корхона бунёд этилиб, бу ерда энди менга ўхшаган ёшлар ишлайди. Ишга жойлашаётганларни корхонанинг ўзида ўқитишяпти. Хуллас, уйимизга, қолаверса туманимиз иқтисодиётига даромад келтирадиган бўлдик.
Корхонанинг атиги бир йил ичида бунёд бўлгани биз учун ҳайратланарли ҳодиса, албатта. Туманимизга чирой қўшиб турибди. Барчаси учун Президентимизга минг раҳмат.
Коллежни битказиб тўғри шу ерга ишга келдим. Корхонада монтаж ишларида қатнашаяпман. Инглиз тилини яхши биламан. Хорижлик ҳамкасбларга таржимонлик ҳам қилаяпман. Хуллас, шундай корхона барпо этилганидан хурсанман.
Фурсатдан фойдаланиб, барчани Янги йил билан табриклайман.
Аслбек САБИРОВ,
Қонликўл туманидаги “КАНТЕКС ИНВЕСТ” масъулияти чеклаган жамияти ишчиси.
