“Ҳозирги пайтда Орол фожиаси сабабли 5,5 миллион гектардан зиёд майдонда Оролқум саҳроси пайдо бўлди.  Ҳар йили 100 миллион тонна қум ва туз ҳавога кўтарилмоқда. Бу эса Орол фожиаси глобал муаммо эканини яна бир марта исботламоқда.  Бирлашган Миллатлар Ташкилоти Бош котиби, жаноб Антонио Гутерриш ҳамда Бирлашган Миллатлар Ташкилоти институтидан, шерик мамлакатлардан миннатдормиз”…

Президентимизнинг Олий Мажлисга Мурожаатномасида келтирилган ушбу сатрларни ўқир эканман, ўтмишни эслайман: “Эҳ-ҳей, Оролни қутқариш бўйича қанчадан-қанча гап-сўзлар бўлган, бироқ кўпчилиги қоғозларда қолиб кетган эди-я…” Бироқ, бугунги кунда экологик фожиа юз берган ҳудуднинг қоқ ўртасида, яъни Мўйноқ туманида бошланган ишларни кўриб, ўз қўлимиз билан қилинган ишларимизгина бизни яқинлашиб келаётган хавфдан қутқаришини тан оламиз. Рақамлар ва фактлар сўзимизга исбот бўлади: “Биз Орол денгизининг сувсиз қолган ҳудудида яшил ўрмонзорлар барпо этишга алоҳида эътибор бермоқдамиз.

Агар мустақиллик йилларида Ўзбекистон бўйича 1 миллион 200 минг гектарга яқин ўрмонзор барпо этилган бўлса, шундан 400 минг гектардан кўпи айни Оролбўйи ҳудудида жойлашган” дейилади Мурожаатномада.

Кўриб турганингиздек, экологик фожиани бартараф этиш ўз қўлимизда экан. Бугун кенг кўламли ишларни амалга оширишга Ўзбекистоннинг имконияти етади. Мўйноқ туманида амалга оширилаётган бунёдкорлик ишлари одамлар қалбида эртанги кунга, келажакка нисбатан катта ишонч уйғотади. Яқин бир-икки йил ичида бажарилиши кўзда тутилган 504 миллиард сўмдан зиёд­роқ кўламдаги бир қатор лойиҳалар, шунингдек 1 триллион сўмлик инвестициялар натижасида туман қиёфаси таниб бўлмас даражада ўзгаради. Замонавий инфратузилмага эга бўлган Мўйноқ шаҳарчаси яқин вақтлар ичида экотуризм марказига айланса ажаб эмас. Ўзбекистон Президенти Қорақалпоғистонни, айниқса Мўйноқ туманини саноати, иқтисодиёти ривожланган обод масканга айлантириш бўйича ҳар доим ғамхўрлик қилиб келмоқда. 2017 йилнинг 28 февралида Мўйноқ туманини иқтисодий ривожлантириш ва аҳолини иш билан таъминлаш бўйича қарор қабул қилинган эди. Бугунги кунгача амалга оширилган ишларнинг ўзи одамлар кўнглида қувонч уйғотмоқда. 20 гектардан зиёдроқ майдонда, хусусан, илгариги балиқ заводи ҳудудида ташкил этилган “Мўйноқ” кичик саноат зонаси, айниқса ёшларни ўз бағрига чорламоқда. Рўёбга чиқарилган мазкур лойиҳа доирасида 100 нафар йигит-қизнинг иш билан таъминланши-бу келгусида қилинадиган катта ишларнинг дебочаси.

“Омад шериги билан келади” дейди халқимиз. 2018 йилда бажарилган 6 миллиард сўмлик ишларнинг ўзиёқ, туман қиёфасини ўзгартириб борган бўлса, 2021 йилга бориб, 1,6 триллион сўмлик ободонлаштириш ва қурилиш ишлари амалга оширилган пайтда Мўйноқни танимай қолишингиз сўзсиз!

Президентимизнинг Мурожаатномасида Оролбўйи экологик фожиаси оқибатларини бартараф этиш, денгизнинг сувсиз қолган ҳудудида яшил қопламалар яратиш орқали ҳар йили ҳавога кўтариладиган 100 миллион тонна чангли тузларни бартараф этиш бўйича айтилган сўзлардан руҳланган Қорақалпоғистон Республикаси Жўқорғи Кенгесининг бутун халқимизга йўллаган Мурожаати одамларда келажакка нисбатан улкан ишонч ва умид уйғотмоқда. Ҳар куни оммавий ахборот воситалари орқали кўраётган ва эшитаётганимиздек, техника ва ишчи заҳиралари Орол денгизининг сувсиз ҳудудида саксовул экишга жадал киришди. Бу ишда фидоийларимиз кунни тунга улаб, шимолнинг бўронли довулига беписанд меҳнат қилмоқда.

Вақтлар ўтади… Халқимизнинг таниқли фарзанди, шоир Ибройим Юсупов башорат қилиб кетганидек: Оролбўйи “ҳали зўр бўлади”. Шунда мўйноқликлар гўзал ватаннинг бир қисми бўлган, Президентимизнинг диққат-эътибори ва фидойиларимизнинг меҳнати билан обод масканга айланган Мўйноқда яшаётганлигидан фахрланади. Иншооллоҳ, у кунлар олис эмас.

Кенгесбай КАРИМОВ,

Қорақалпоғистон халқ шоири.