Кўклам нафаси уфуриб турган айни дамда оиламизга кўрк бағишлаб, баҳри-дилимизни яйратиб турувчи гулларни ким ҳам севмайди дейсиз!? Гуллар билан ҳеч суҳбатлашиб, хислатларини ўзига сўзлаб кўрганмисиз?
Майин ифори қалбингизга ором бағишлаб, кайфиятни чоғ этади. Гулларни севиш, уларни меҳр билан парвариш қилиш керак. Ана шунда улар янада чирой очиб, бўй чўзади. Биласизми, гулларнинг баъзилари ажойиб хислатларга эга. Бири оилангизга даромад, бири қувонч, бири бахт олиб келади. Шунингдек, барча гуллар хона ҳароратини янгилаб, ўзидан кислород тарқатади. Бу эса саломатлигимиз учун жуда фойдалидир.
Тўрткўллик Нурпошша Матниязова ҳам гулларга меҳр қўйган инсонлардан.
— Ўлкамизга баҳор фаслининг кириб келиши аввало бободеҳқон меҳнатида кўринади, — дейди Нурпошша опа. — Мана шундай дамларда далаларда иш қизийди. Айниқса, байрам арафасида аҳолининг гулларга бўлган эҳтиёжи янада ортади. Биласизми, ҳозир одамларимизнинг турмуш даражаси, дунёқараши ўзгарган. Авваллари кўпчилик хонадонларда сунъий гуллар бўлиб, табиий хона гулларига талаб юқори эмас эди. Аммо, сўнгги йилларда аҳолининг гулларга бўлган меҳри ошди.Улар эндиликда хона гулларини ҳамда ҳовлиларига гул кўчатларини ўтқазиб, парваришламоқда.
Н.Матниязова 2010 йили ташландиқ ҳолда ётган 24 сотих ерни обод қилиб, “Тўрткўл гуллари” хусусий корхонасини ташкил этди. Шунингдек, 2 сотих ерда иссиқхона қуриб, гул кўчатлари, уруғлар ҳамда турли хил гулларни етиштириб келмоқда. Бугун бу ерда етиштирилаётган ҳамда парваришланаётган 50 турга яқин анвойи гуллар мактаблар,корхона ва ташкилотлар, шунингдек, марказий кўчалар, аҳоли хонадонларини безаб турибди.
Нурпошша опанинг гулларга бўлган меҳри ўзгача. Ҳар бири алоҳида парваришга, эътиборга муҳтож бўлган гулларни ҳар куни эрталаб ўз фарзандидек эркалашдан, меҳр ила парвариш қилишдан чарчамайди. Унинг мана шундай завқ ва фидоийлик билан қилган ишлари зоя кетмади.
У 2013 йилда хотин-қизларнинг қобилиятини рўёбга чиқариш, тадбиркорлик фаолиятини ҳар томонлама қўллаб-қувватлаш мақсадида анъанавий тарзда ўтказиб келинаётган кўрик-танловнинг Қорақалпоғистон Республикаси босқичида 1 ўринни эгаллаб, мамлакат босқичида “Тадбиркор аёлнинг энг яхши лойиҳаси” номинацияси бўйича биринчи даражали диплом билан тақдирланди.
Қаҳрамонимиз доимо интилиш ва изланишда. У “Микрокредит” банкнинг туман филиалидан 10 миллион сўмлик имтиёзли кредит олиб, туман марказида “Тўрткўл гуллари” хусусий корхонасининг шохобчасини ишга туширди. Ҳозирда корхонада уч кишининг бандлиги таъминланган.
Нурпошша опа билан суҳбатлашсангиз, қалбидаги эзгу ниятларини тинглаб,дилингиз ёришиб кетади. Қизиқишимиз устун келиб йиллик даромадини ҳам сўраб кўрдик. –Биласизми, баҳорнинг илк кунидан бошлаб шу кунга қадар 200 га яқин тувак гуллари ҳамда 5 мингдан ортиқ гул кўчатларини етиштириб, сотишга эришдик. Йиллик даромадимиз ҳам шунга яраша бўлади. Аслида даромаддан кўра гулларни парваришлаш менга кўпроқ завқ беради. Авваллари бирон-бир маҳалла ёки қишлоқлардаги янтоқ ва шу каби ўтлар босиб кўримсиз,қаровсиз қолган ҳовлилар атрофларини кўрганимда ич-ичимдан эзилиб кетардим. Аммо, ҳозир одамларимизнинг ўзлари яшаб турган ерни кўкаламзорлаштириш, обод қилишга иштиёқи кучли.
Ҳа, бугун Тўрткўл томонларга йўлингиз тушиб қолса, Нурпошша опанинг дўконидаги бир-биридан ажойиб гулларни кўриб қалбингиз ёришиб кетади. Ўз севимли касби орқали инсонлар кайфиятини кўтариб, ширин табассум ва шодлик улашаётган Нурпошша опанинг нияти-юртимизни гулларга буркашдир.
